ஆர்கௌ மாநிலம் லீப்ஸ்டாட்டில் (Leibstadt) நிறுவன வளாகத்தில் நேர்ந்த துயரச் சம்பவம் – தமிழ் சமூகத்தில் பெரும் சோகம்!

சுவிட்சர்லாந்தின் ஆர்கௌ (Aargau) மாநிலத்தில் இடம்பெற்ற பாரிய Forklift விபத்தில், 16 வயதுடைய தமிழ் இளைஞன் ஜேடன் சுதாகரன் (Jaden Sudhakaran) உயிரிழந்துள்ளார்.

யாழ்ப்பாணம், பருத்தித்துறை, அல்வாய் வடமேற்கு மாறாம்புலத்தைப் பூர்வீகமாகக் கொண்ட ஆழ்வாப்பிள்ளை விக்னேஸ்வரலிங்கம் (விக்கி) அவர்களின் பேரனான ஜேடன் சுதாகரனின் அகால மரணச் செய்தி குடும்பத்தினர், உறவினர்கள் மற்றும் தமிழ் சமூகத்தினர் மத்தியில் பெரும் சோகத்தை ஏற்படுத்தியுள்ளது.

கிடைத்த தகவல்களின்படி, ஆர்கௌ மாநிலத்தின் லீப்ஸ்டாட் (Leibstadt) பகுதியில் அமைந்துள்ள மரப் பதப்படுத்தும் நிறுவனமான Kuratie Jaecker Holzverarbeitung நிறுவனத்தில் முதலாம் ஆண்டு தொழிற்பயிற்சி மாணவராக ஜேடன் பணியாற்றி வந்துள்ளார்.

தொழிற்பயிற்சியின் ஒரு பகுதியாக நிறுவன வளாகத்தில் பாரம் தூக்கும் வாகனமான Forklift (Hubstapler) ஒன்றைச் செலுத்தியபோது இந்தத் துயரமான விபத்து இடம்பெற்றுள்ளதாகத் தெரிவிக்கப்படுகிறது. இந்த விபத்தில் படுகாயமடைந்த அவர் உயிரிழந்துள்ளார்.

தனது 16 வயதிலேயே தொழிற்பயிற்சியைத் தொடங்கி, எதிர்காலக் கனவுகளுடன் பயணித்துக் கொண்டிருந்த இளம் மாணவன் இவ்வாறு அகாலமாக உயிரிழந்தமை அனைவரையும் அதிர்ச்சியிலும் ஆழ்ந்த துயரத்திலும் ஆழ்த்தியுள்ளது.

இளமைக் காலத்திலேயே நிகழ்ந்த இந்த உயிரிழப்பு, அவரது குடும்பத்தினருக்கு ஈடுசெய்ய முடியாத பேரிழப்பாக அமைந்துள்ளது.

அன்னாரின் மறைவால் துயருற்றிருக்கும் பெற்றோர், குடும்பத்தினர், உறவினர்கள், நண்பர்கள் அனைவருக்கும் எமது ஆழ்ந்த இரங்கல்களையும் அனுதாபங்களையும் தெரிவித்துக்கொள்கிறோம்.

16 வயதில் மலர வேண்டிய ஓர் இளம் வாழ்க்கை பாதியிலேயே முடிவுற்றது.

அன்னாரின் ஆத்மா சாந்தியடைய இறைவனைப் பிரார்த்திக்கின்றோம்.

ஆழ்ந்த இரங்கல்கள்!