ரஜனி அன்ரன் (B.A.) தியாகத் திங்களிது… 24.09.2026

தியாக மைந்தன் திங்களிது
பசித்தீயை ஒறுத்த பார்த்தீபனின் திங்களிது
புரட்டாதி வந்ததும் நெஞ்சம் கனக்கும்
தியாகத் திங்களாய் பூமியும் நிறையும்
புரட்டாதித் திங்கள் தியாகத்தின் தினங்களே !

நல்லைவீதியில் தொடங்கிய நோன்பு
நாட்கள் பன்னிரெண்டின் அகிம்சையின் நெருப்பு
உணவின்றி துளிநீரின்றி உருகிய தியாகி
உரிமையை வேண்டிநின்ற உன்னதயோகி
புரட்டாதித் திங்கள் ஒவ்வொரு நாளும்
தியாகத்தின் சுவடாய் எம்மோடு பேசும்
புரட்டாதித் திங்கள் தியாகத்தின் திங்களே !

தமிழின உரிமையின் தார்மீக நாயகன்
அகிம்சை வழியின் அஞ்சாநெஞ்சன்
தன்னையே ஈகம்செய்த தியாகச்சுடர்
தமிழின வரலாற்றின் அழியாக்காவியம்
தியாகத்திங்களின் தியாகமைந்தன் !

Author: ரஜனி அன்ரன்