மொழியே முகவரி…….

ரஜனி அன்ரன் (B.A) மொழியே முகவரி….. 17.09.2026

மொழியே என்விழியே நீயே என்முகவரி
கருவறைத் தொட்டிலில் கேட்ட
முதல் தாலாட்டின் ராகம்நீ
மூச்சுக்காற்றின் ஜீவனும்நீ
நாடி நரம்புகளில் ஓடும் குருதியின் சத்தமும்நீ
நிலையான நித்திய முகவரியும்நீ !

காலங்கள் கோலங்கள் தான் மாறினாலும்
அடையாளமாய் வாழும் அதிசயம் தான்நீ
எழுத்துக்களால் இதயத்தை ஆளுகிறாய்
வார்த்தைகளால் வாழ்வைச் செதுக்குகிறாய்
கடல் கடந்து சென்றாலும்
கண்முன்னே வந்துநிற்கும் அதிசயமேநீ !

முகமூடிகளின் உலகமிது முகத்தைக் காட்டும்
ஒரேகண்ணாடி மொழிமட்டுமே
ஆயிரமாயிரம் முகவரிகள் அஞ்சல்பெட்டியில் தூங்கலாம்
அண்டத்தின் எந்தமூலையிலும்
அடையாளம் காட்டும் முகவரி மொழியே
தேசஎல்லையைத் தாண்டிநின்றாலும்
நேசமாய் நாவில் உச்சரிக்கும் மந்திரம் மொழியே !

Author: ரஜனி அன்ரன்