“ மாவீரர் ஈகம் “ கவி….ரஜனி அன்ரன் (B.A) 21.11.2024

மாவீரர் ஈகம் மகத்தான தியாகம்
சாவுக்கு நாள் குறித்து
சரித்திரம் படைத்த பயணம்
தாய்த்தேசம் தனைமீட்க
தேசீயத்தின் கனவை நனவாக்க
தேகத்தையே ஈகம் செய்த
தேசமைந்தரின் தியாகமெல்லாம்
பேச வைக்குதே கார்கால கார்த்திகையில் !

உன்னத இலட்சியத்திற்காக
இலட்சியத்தின் வெற்றிக்காக
இறுதி மூச்சு வரை போராடி
உறுதியோடு மண்ணை முத்தமிட்ட
உன்னத மறவர்களின் ஈகம்
ஈடிணையில்லா வரலாற்றுக் காவியம் !

தாய்த்தேசத்தின் தாகம் தீர்க்க
தம்முயிரைப் பணயம் வைத்து
நீதியின் பாதையில் நடந்து
நெஞ்சினில் தீயினை ஏந்தி
புறநானூற்று வீரம் காத்து ஈகம் செய்த
புதுநானூறு படைத்த மறவருக்காய்
தீப ஒளியேற்றி விழிகளை ஒளிர வைப்போம் !

Author: Nada Mohan