ஷர்ளா தரன்

சலவை
வெண்மை பெற சலவை
தூய்மை தந்திட சலவை

வெள்ளை வேட்டி கட்டியோரும்
வேத வாக்கு குடுப்போரும்
சங்கங்கள் பல அமைப்போரும்
அதற்கு சங்கீதம் பாடுவோரும்
பங்கம் விளைவிப்போரும்
பங்கு பிரிப்போரும்
பக்கம் பக்கமாய் சாய்வோரும்
பக்குவம் அடைந்திட
வெண்மை அது கண்டிராரோ
மனச் சலவை அது கொண்டு

கந்தை ஆனாலும்
கசக்கி கட்டு
முன்னோர் வாக்கு
முழுமையான வாக்கு இது
சொக்கா போடுவோரும்
சொகுசு சேலை கட்டுவோரும்
வாசம் பெற வாசனை திரவியமும்
தேகம் மினுங்க
தேவையற்ற செலவுகளும்
பாசம் இன்றி
பணத்திற்கு பின்னால் ஓடுவோரும்
வேசம் கலைத்திடாரோ
வேதனை தனை போக்கிடாரோ
வெண்மை அது கண்டிராரோ

ஆளுக்கொரு கட்சி
அவருக்கு நாலு அறிவாளிகள்
ஆரவாரமாய் கட்சி வேலைகள்
ஆங்காங்கே காசு புரட்டல்கள்
ஆட்சி அமைப்பதற்குள்
ஆழுக்கு நாலு வீடு வளவுகள்
காலுக்குள் நசுங்கும் மக்கள்
பல காயங்கள் கொண்டு எழுந்திடுவர்
மீண்டும் கை கூப்பி நின்றிடுவர்
கை தூக்கி கோசம் போட்டிடுவர்
மக்கள் மனம் கொள்ளாதோ சலவை
மன்றம் அது கண்டிராதோ
நல்லதொரு தலமை

ஷர்ளா தரன்

Author: Nada Mohan