ரஜனி அன்ரன் (B.A)..புதைகுழிகளின் மர்மங்கள் 27.08.2026

காணாமல் ஆக்கப்பட்டோர் நாளும்
காலம்தோறும் கனதியாய் மனதைத்தைக்க
புதைகுழிகளின் மர்மங்களும் புரியாதபுதிராக
நாளுக்குநாள் மனித எச்சங்களும்மீட்பு
செம்மண்ணுக்குள்ளே புதைந்த வலிகளையும்
தேடப்படும் உறவுகளையும் நீதிக்கான வலிகளையும்
ஆத்மாக்களின் மெளனக் குரல்களையும்
சுமந்தபடியே புதைகுழிகள் சாட்சியாகிறதே !

பூமிக்குகீழே புதைந்து கிடப்பது வெற்றுடல்களல்ல
வெளிவராத சத்தியங்களும் விடைதெரியா வினாக்களுமே
பூமிக்குமேலே மெளனத்தின் ஆட்சி
புதைகுழிக்குள்ளே கதறலின் சாட்சி
அடையாளம் தொலைத்த ஆடைகளும்
அறுபட்டுப்போன நம்பிக்கைகளும்
மண்ணோடு மண்ணாக மக்கிப்போனதுவே !

நீதியின் கதவுகள் சாத்தப்பட
அநீதிகள் தலைவிரித்தாட
மண்ணின் மடியில் மனுதர்மம் புதைந்ததே
புதைகுழிகள் வரலாற்றுப் பெருங்காயம் !

Author: ரஜனி அன்ரன்