மதிமகன்

சந்தம் சிந்தும் சந்திப்பு
வாரம்: 261
16/04/2024 செவ்வாய்
“பெருமை”
—————
உயிரைச் சுமந்திடும் கருவை,
உளமாய் போற்றுதல் பெருமை!
உயிரினும் மேலாமெம் தமிழை,
உயிராய்ச் சுமப்பதே பெருமை!

உலகத் திருமுறையின் மேன்மை,
உருவாக்கியது தமிழன் திறமை!
விலக வொண்ணா இவ்வருமை,
வியந்து போற்றுவதில் பெருமை!

ஐம்பெரும் காப்பிய மேன்மை,
அறிந்தால் கிடைக்கும் பெருமை!
நம்பெரும் இலக்கிய அருமை,
நாடெல்லாம் பரவிடப் பெருமை!

உழுதுண்டு வாழும் உணர்வை,
உலகே உணர்வது பெருமை!
தொழுதுண்டு வாழும் மடைமை!
தொடர்ந்திட மங்கிடும் பெருமை!

கள்ளின் நிறமது வெண்மை!
கறவையின் பாலுமத் தன்மை!
புள்ளின அன்னத்தின் திறமை,
புகுந்திடின், சேருமே பெருமை!

நன்றி
“மதிமகன்”

Author: Nada Mohan